星情飯局 終於⋯⋯我是我 張振朗
佛家主張無我，但是作為一個演員，最怕是「無我」—無自己Character！張振朗，由初出道被人說他似黃宗澤，然後又再話似Chilam張智霖，一直都是人家的影子。幸好有《愛・回家2》，劇中的Anson把「張振朗」這個名字帶回來。「係㗎，真係要多謝呢個角色，令依家觀眾真正知道我係邊個！」張振朗開心地說。
似Chilam係意外一般家庭觀眾未必知道張振朗的英文名“Owen”，但若是今天在街上碰到張振朗，不少人也會叫他做“Anson”。「始終做其他人嘅翻版冇咁好啦，點都要拉埋人哋個名，不過呢個圈，新人係難畀人記得，除非你好爆！所以啱啱出道嗰時，畀人話似Bosco（黃宗澤）算係件好事。至於似Chilam呢，真係有啲意外，係喺《Sunday 扮嘢王》，我扮咗劉德華、張家輝等，結果家燕姐同祖藍都覺得我扮Chilam似，出場再戴埋副太陽鏡，估唔到反應咁好，仲因為咁，新年期間帶畀我唔少商演機會呢！」張振朗於2006年參加《英皇新秀歌唱大賽》，隨之而踏進娛樂圈，由完全沒有想過演戲，變到今天「好Like」演戲。「啱啱開始嗰時，我決定畀自己三年時間喺呢行試吓發展，如果唔係好得，就諗住叠埋心水去做地產、去搵錢！」今天捱得過了，娛樂圈有了一個張振朗，不然，可能大家在報紙地產版見到有個「經紀Bosco」正在訴說最近的樓價又見底了，哈哈！角色要認真對待《愛·回家2》將成過去式，Anson這角色帶給張振朗的，除了是在壓力中成長之外，每天如朝九晚五上班族去應對不同的人，也實在教曉他怎樣去「滿足大家」。「前前後後都有好幾個導演，又有唔少演員啦，所以喺呢套劇，帶畀我一定嘅知名度，最大得着係極速調節自己、人之間嘅遷就。同埋畀我認識咗張繼聰，佢教我好多嘢，對我演戲係好有幫助！」跟張振朗坐在French Window 靠窗位置，陽光影照下，他兩目炯炯，說得雀躍，「依家快開新劇，我做酒店太子爺，性格有啲寸、玩味嗰種！不過，我都約咗啲真係做緊酒店嘅朋友，問佢哋做嗰行嘅嘢，演得要似模似樣先OK㗎！」張振朗對於演戲是認真對待的，之前Anson一角時，務求演繹瑜伽教練似模似樣，也走去上瑜伽班，「我都係一個幾執着嘅人，硬頸啦，同埋有些少反叛，當有啲嘢迫到我嘅底線，啲脾氣就出嚟，但基本上都算隨和嘅！」張振朗說得沒錯，他確是隨和、認真的人，在這次訪問可見一斑。話說，在攝影師「指使」下，張振朗不做輕鬆的Chok樣笑樣萌樣，真的在約三米高紅酒櫃的爬梯上，擒高彎低在爬梯做出不同的喝紅酒Pose，為求給一張特別一些的《星情飯局》開版相，這是少一分隨和和認真也不可完成的，而張振朗專業的態度，真心一讚！
撰文：Carrie Yip攝影：David Lee@chinapixel美術：Ronnie Cheung
Search